sika

sika
sika so kalakal
tan kaugsan na kanonotan ko
sika so lua
liket tan ermen na matak
sika so esaes
ingal tan kareenan na pakarengel ko
sika so Gumamela Celis
angob na rosas ed labi tan kabuasan

sika so engas
samit tan pait na bibil ko
sika so balikas
bilay tan patey na inkamakatak
sika so aplos
petang tan betel na dakulap ko
sika so panangaro
parok na puso ed pagew ko

sika so taoen tan dalin
sika so kamundoán
mundo ya nanlapuan
sika so bilang
minuto ed kada oras
agew na bulan ed onlalabas iran taon

sika
sika so Urduja
na daan tan balon Pangasinan
sika et siak
siak et sika lan lamang
pinalsan pinankasakey
anino tan laman na Dyus
ya ag naigulis so lupa

07/19/2001

Urduja
(sakey a sonito)

Kaoalaan mo natan Urduja?
Anggapo'y makaamta no iner
So angisinopan da ed sika
Say linget tan dala'n inpaterter
Tinmubo iran dika na dalin
Pian nasakuban so nanarian
Ag ko amta no aya so bilin
Bilang prinsisa na Kaboloan
Nabilang so istoryan nisulat
Istoryan mangipakabat komun
No sika et tua ono uliran
Bonga'y kanonotan na totoon
Pinabli 'ran maong so luyag da
Kanian say ngaran mo inako ra

08/25/2002

dia'd pagew na Cordillera

naandi la so bilonget
ya akabalabar ed bulan
singa no ermen da'ra'y biteoen
ira'y matan manantandag
ed saray aninon nababalang
ed masukal a dalan paunla'd
sakey ya amut a sipanan

aminsan
say padyak na sali ra labat
so narengel kada kabuasan
aoi-aoit da'y araro alioan armas
linget alioan dala so onteterter
ed apoolan dan katat
tan naksaoan a laman

anton pasnuk so mandarlang
dia ed pagew da
kanian sikara natan et singano
barbaron ag makalikna'y sugat
na salita tan ketket na betel?

nabuas
dia ed pugaro - kalbaryo
da'ra'y kayomanggin sinturion
nanengneng ira so tanda
anggapo'y ngaran o pakanonotan
saray dikan balang labat
tan manuk ya atap so akapan-abuloy
na dasal antis iran inkutkut
ed lingoan

09/19/2002

Binasa na akansulat nen agaoa so 1st Poetry Reading ed Pangasinan nen Marso 21, 2003 dia'd Computronix College, Dagupan City bilang suporta na luyag ed say 2003 Dialogue Through Poetry Week tan World Poetry Day na UNESCO.

bini
(para ed say Ulupan na Pansiansia'y Salitan Pangasinan tan saray mansusulat ed abangonan a salita)

isibuag tayo'd intiron luyag
saksakey akup a binin bokel
no oala'y ontubo ed saraya
itanem ed mabuna ya dalin
pian ombaleg iran mabulaslas
no nambonga lara et burburen
pilien so nayarin binien
tiponen angga ed naparakel

onya komun so gaoaen tayo
ed litiratura'y Pangasinan
isulat - payamanen so porma
imahin tan say ritorika to
tan uksoyen ed antolohiya
ipaamta ed saray karaklan
say bilay na sakey a salita
oala'd mabunan litiratura

09/30/2002

ala e. e. cummings

o
ala r
a so (ka
ibaan ed)
tapew
na (p
ongol)

(bari
bari)
ag kayo
mangi
bamba
no (laki
tan bai)

(mi
labas
ak pa) y
a mag
an
o

10/12/2002

birso
(basi ed duaran karaanan ya anlong)

1.

nanlapu ak diman
ed samsamput ya taoen
inosuk ko'y dayat
pinigar ko'y lurem
dia'd kapobri'ay palar
dia ak agi apaktak
dia ak agi akarateng
natan sika'y amamayo
ed labi tan agew

2.

kinmalab ak ed palandey
nakar ko 'ran pinapatey
so mabayanin tabuney
insublay ko 'ra'y gilata
agi! agi! kinetket da
so lusik ya amintana

11/23/2002

noli me tangere
(agmo ak didioiten)

aleg ag mo ak didioiten
no say oala'd kanonotan mo
et mangabil na kaparam
ag mo ak tataoage'y pangalatok
ag mo ak tataoage'y pangalatot
ta onpano unalitengteng
so duaran layag ko agi
ibasibas ko'd sika
iya'y aoit kon latok
onsempet kan say lupam
singano dinumog na kamontok
sakey simba kan ag makamulagat

aleg ag mo ak didioiten
ag mo ak tataoage'y pangalatok
ag mo ak tataoage'y pangalatot
ta alioalioan pangaran itan
say labay ton ibaga et marurutak
inumpisaan da'ra'y anpuputin bakes
tan mimistison bangus nen saman
ag mo la ira aaligen agi aleg la
ta anggan anto'y karukey na pasinsiak
onpano nasabim so samsamput
onsempet kan say lupam
singano dinumog na kamontok
sakey simba kan ag makamulagat

11/25/2002

salin ed liriko 4
(nen Jose Garcia Villa)

O say Mata ya nanengneng to ak,
tan say Sangi ya angoban to ak.
tan say Rosa ya alageyan ko,
tan say Lima ya dioiten to ak.

aya et dia'd Oras da'ra'y salming.

O say Tigri ya ituro to ak,
tan say Lioaoa ya leneren to ak.
tan say Bosis ya kansionen to ak,
tan say Dyus ya ekalen ko'd trono.

aya so Patey ya alageyan ko.

Ibali
12/05/2002

salin ed liriko 81
(nen Jose Garcia Villa)

say dagem linmioaoa,
say agew sinmibuk:
saray bolobolong kinmutkut,
saray lamulamut binmuneknek -

onnenengneng tayo ed salming
nen Narcissu.

saray manuk nanrosas,
saray rosas tinmikiab:
saray kamontok angansion,
saray manuk anoruk!

onnenengneng tayo ed salming
nen Narcissu.

ya agay la'y dakep
bilang si Iesu,

ya agay la'y ermen
dia'd sayan salming -
no nanengneng so lupa na toon
naaninag diman

(say dagem linmioaoa
say agew sinmibuk
saray bolobolong kinmutkut
saray lamulamut binmuneknek)

O makapakelaw ya salming
O makapakelaw ya salming
no iner say lupa na toó
et si Hudas.

Ibali
12/08/2002

salin ed limaran Aphorisms
(nen Jose Garcia Villa)

1.

say,diamantin,impanutek,
manisia,ed,Lioaoa.

2.

say,panag-aral,sakey,labat,a,Sobri--
iter,mo,ed,siak,so,Sulat.

3.

say, Dyus,singano,katli,
mabetbet,ya,paris,
sikato,diman,siak,dia.

4.

dia'd,pegley,na,duaran,punto,pian,naalmo,
alioan,say,mainumay,a,maptek,a,gulis,
balet,say,Kurba,na,Andi-anggaan.

5.

Saray,taoen,nisulat,
ta,saray,anlong,nianak.

biteoen ya taga-dalin

kalabian tinoor ko'y insipan
begtebegtew kon binaliw
so uman nilaknaba'y bilonget
pilalek a nanengneng
so rikit mo lamet

masimoon ak ya nambilang na biteoen
legan a manaalagar ed sikan
mangilugay na buek
tan mamintanan magano -
sinyalis na iyasingger ko

unabobon ira'y makanengneng
no ibagak ya sika et sakey
a biteoen ya taga-dalin
agkan-agka isalat inaro
ed saray biteoen ya taga-taoen
ya no kaputi'y bukig
anggapo la'y nanengneng

biteoen ya taga-dalin
no onleksab ka la'd isaknap na lioaoa
imis ya mayumis mo labat
nalener la'd gayaga so puson
uniibeg ed sika
naandi la kalamor
anggano say puyat
ono pakakaugip na mata

tanka

amisin ngalab
ankelankit ya apoy
nankantikanti

onsilew tan naandi'd
sakey kirem na mata

Kopian makanepegan © 2003 nen Santiago B. Villafania
Amin ya kopia ondalan ed makankanepegan.